حب وفراق

الله يـوفـق مثـلـك الله يخـلـيـه
كانك نويـت الصـد والهجـر ويـاه
غالي ولـك بالقلـب شـي ومخفيـه
اكبر مـن اللـي بالضمايـر تهقـواه
في غيبتك قلبي تـرى الهـم صاليـه
واسهرت ليلـي بيـن ونـه وويـلاه
البارحه طيفـك مـع الليـل احاكيـه
يشهد علـي الليـل والنجـم يصغـاه
فكـرت ويـا الليـل مبـدع قوافيـه
مسحـوب طرقـي والقوافـي تقفـاه
والحزن فوق القلـب والهـم مقفيـه
و ليلي غدا ليليـن والصبـر مقـواه
اكتب شطروالشطر الاخـر نجاريـه
شاعـر تحـد ه والليالـي تـوطـاه
اجزل بيوت الشعـر وحكـم معانيـه
ولا هزيـل القـاف واضـح ثنايـاه
ياللي حرقت القلـب منهـو يطفيـه
النار نـار ٍ تتعـب القلـب واحشـاه
يا مانسيت اللي مـن النـاس نغليـه
ولاعاد به شـي ليـا حـل طريـاه
استر عيوب الناس والطيـب ابديـه
وش خانت اللي ماسترعيـب رفقـاه
امسٍ وقبـل البـارح القلـب اهنيـه
امسي مع الفرحـه وصبّـح بفرحـاه
في شوفتك افرح مع اللحـن اغنيـه
وطيفك يسلـي كـل طـرقٍ بمغنـاه
قلبي كثير اللي مـن النـاس ترجيـه
وانا الذي قلبك مـن النـاس يرجـاه
لاتحسب ان الصـد صعـبٍ تحديـه
ترى الزمن يشكـي ومثلـي تحـداه
انشد وتلقى الليـل تقصـر مساريـه
صدر الزمن يشكي من اقصاه ودنـاه
راحت هجوسك مبعده فـي هقاويـه
انشد جبـال اطويـق واللـي ترقـاه
تلقـى زمانـك قاصـرات ٍ لياليـه
هذا الصحيح وتدمـع العيـن فرقـاه
وانت الذي لاضاق صدره نراضيـه
نتعب على شانه على شـان نرضـاه
ولا انت تدري من زعل عيب اصافيه
يادارس اطبـوع المشاعـر وتـدراه
يا ما لقيتـك تشكـي الهـم تشكيـه
وجهك عبوسٍ تشكـي الحـظ بـرداه
ياللي خذيت القلـب وشعادكـم فيـه
رده ترى قلب العنـا وافـي اشقـاه
ارفـق بقلـب هالليـالـي تفاجـيـه
يابـو ثمـانٍ مرهـفـاتٍ مصـفـاه
انا عشقت وعشقـي محـدٍ يظاهيـه
جيتك على الفطره وذ القلـب يغشـاه
احساس من قمـة شعـورٍ وطريـه
عليك ياللـي ناسـي القلـب تنسـاه
في كفـي سيـفٍ للعواذيـل مرهيـه
وفي صدري درعٍ لسهـوم المصـلاه
ياقلبـي الليلـه علـى وادي التـيـه
جريت ونـه والـف ونـه مـن الأه
اسمع صدى صـوت المعنـا بتاليـه
اضحك واقول الله يعيـن الـذي تـاه
والحق انا اللـي تايـهٍ فـي دواهيـه
مجراك نـار تكـوي القلـب تكـواه
باغيـه قلبـي والمشاعـر تنـاديـه
قلبي عشق قلبـه مـع الليـل نـاداه
يفداك منهو يجمـع اريـال وجنيـه
يفداه وجـه الطيـب والعـز يفـداه
مثل البواخر لا رست فـي مراسيـه
حبك رسا صبح ومسا ابكل مرسـاه
بين الظلـوع الحـدب حبـه ابنيـه
واكتب عليه من الغـلا شـي يزهـاه
لكنّ كيـف القلـب هـذا امتناسيـه
ياصرح مدري جرح ياجـرح ودواه
يمكـن صواديـف الليالـي تحاديـه
ولاّ تغـلا والغـلا فــي مـزايـاه
لكـنّ قلبـي ماصبـر ليـل مشقيـه
دنت هجوسي والبـلا فـي محاتـاه
هـمٍ علـى قلبـي وهـمٍ يبـاريـه
ولا جـروح القلـب صعبـه تبـراه
البارحـه قلبـي مـن اللـي يداويـه
ياكود وجـهٍ يبـري الجـرح ملفـاه
حامت شياطيـن الشعرمـن بلاويـه
وسرحت في عالم صعيـبٍ بمسـراه
هلّت دمـوع العيـن هلّـت غواديـه
على الذي قلبـي مـن النـاس بـداه
اكتب حسين القاف وارجـع ومحيـه
جـف القلـم حبـره ولا نافـعٍ مـاه
شطـرٍ نهليبـه وشـطـرٍ نحيـيـه
وشطرٍ على ماقيـل ملعـون مثـواه
هـذا حبيـب ولا عليّـه مشـاريـه
عشره قديمـه والحكـي تـوّ معنـاه
ترى الوفـا والطيـب حـق ٍموّفيـه
ترى الغـلا والحـب حـق موّفـاه
من باعني بعتـه وتقصـر خطاويـه
مدعي عليه ادعي عسـى الله يرعـاه
لا ياندي العـرض هـذي تواصيـه
ابوي انا اللي وافي الهـرج بوصـاه
وانا الذي من يشري القلـب شاريـه
هـذا محلـه قلبـي واسعـد بلقيـاه
اقلّطـه فـي صـدر قلبـي وهلّيـه
.ارحب هلا واهلاٍ وننحر لـه الشـاه
ونقـدّم الفنجـال والهيـل حالـيـه
اشقر مقره مـن ورى الهنـد مجنـاه
يعني انتهى المشوار لابـاس ياهيـه
خمسين بيـتٍ شاعـر الجـن سـواه
وخمسين بيتٍ تقفـي اللـي مسويـه
مسرج خيول الجن واهجيـك بحكـاه
مـن قـدّم الطيبـه نرفّـع معاليـه
ومن قدّم السيّه مـع الـدرب دسنـاه
ادعيك من قلبي وانا الغيـر مدعيـه
مشتاق انا والشـوق وشلـون ابنهـاه
في داخلي حربٍ من الشـوق مذيـه
والصبر طعمه مر وكيـف اتحلـواه
من لايعرف الحـر لاشـك يشويـه
اخطيت في حقي وانا ارجيك رجـواه
انا الذي منهـو رقـا فـوق اوطيـه
عليـك ياللـي كـل رجـمٍ تـعـلاه
لا تحسب اني بسهر الليـل مقضيـه
جاتك مثايـل وفهـم القـول وقـراه
قبل امس احبه وفتخـر فـي تلاقيـه
واليوم هذا مثلـي صـرّح كرهنـاه
الخط الاحمـر ليـه نفسـك تعديـه
قد قلـت الـك ومحـذّرك لا تعـداه
رادي ومثلـي لاحشـى مـا ترديـه
درب الردى لارحـم منهـو تمشـاه
كان الغـدر ميـزه وتفخـر بتاليـه
الله يعينـك تالـي الوقـت عــزاه
تصبح مابيـن النـاس محـدٍ يدانيـه
قبلك صفق يمناه فـي كـف يسـراه
الرادي اللي يمشـي محـدٍ يراعيـه
هذي حياتك باخـر الوقـت وتـلاه
ياللي تقول الحـب وافـي ومرخيـه
حبل الوفا تقصـره وشلـون ترخـاه
الحـر لامـن فـز يكفـخ جناحيـه
انا عزيـز النفـس واللـي ورثنـاه
المرجلـه والطـيـب لازم نقـديـه
مانـي شحيـحٍ تايـه ارداه بــرداه
واليـوم ياوجـهٍ بـدا فيـه وشفيـه
الاّ عرفـت القلـب هـذا ومرضـاه
لا يالذي قلبك مـن الغـدر تحشيـه
هذا وانـا مهجيـه وذكـر حلايـاه
.لكن علـي الله ماعـاد انـا ارجيـه
فـي رجعتـه هـمٍ ولا عـاد نبغـاه
فيـه البقـا واللـي حلاتـه نعزيـه
اقولهـا مـن بعـد هـذا عرفـنـاه
يرثيه وقت الحـب والحـال ترثيـه
كـم واحـدٍ قبلـك ترانـا رثيـنـاه
هـذاك غالـي والله اللـي متوفـيـه
ولاانت لا مثله ولا وجيـت شـرواه
يشهد له التاريـخ حضـر وبواديـه
يرحمك ياللي وافي الطيـب والجـاه
ونتي بديتـي بالغـدر مـن مواريـه
عمر الغدر شايـن ولـو زان مربـاه
درب العنا ياللـي نويتـي مساعيـه
خايب وظنك ضايـع ابكـل مسعـاه
فيك الغدروافي على كـل اراضيـه
ثوب الغـدر مـا والله يـومٍ لبسنـاه
بأسم مـن انـزل محمـد وحاميـه
الـواحـد القـهـار ربٍ عبـدنـاه
ماني على صدك ترى القلب اعنيـه
وشعاد يعنـي لـو مثلـك هجرنـاه
القلب يسلا مع هـل الطيـب اسليـه
عندك خبر كلٍ على كيـف مشهـاه
اقفت ليـال الحـب واقفـت لياليـه
والشـوق روّح لاترجـى وتنصـاه
اطغيت حتى القلـب بالغـدر معميـه
الصبح لك قلبٍ مـع الحـب يهـواه
والليل لك قلـبٍ مـن الغـدر ماليـه
كنت الامل والنفـس مثلـك تحـراه
ماني صغير السـن مثلـك يخطيـه
اخطيت ياللـي كـل شـيٍ تخطـاه
اللـي رقـا للخيـر ربـي يجازيـه
جعله بخير وراعـي الطيـب حيـاه
واللي يحـب الشـر منهـو يخاويـه
ياكود مثـل الطبـع لاشـك خـاواه
العقل راس المـال وشلـون اقديـه
في ذكر ربٍ عالـي النـاس تخشـاه
جفت عروق القلب جفـت خباريـه
لا تحسـب ان الحـر مثلـي تشـواه
حرٍ وفـي وصفـه طـوالٍ مواميـه
انا عريـب الجـد ياضايـع اجـداه
اخطيت في قلبي على الكيف مهديـه
انا اشهد اني ظالـم القلـب وسقـاه
اسقاه مـن ظيـم الليالـي ومسقيـه
هـمٍ وكـل هـمٍ موفّـي زوايــاه
الصدر لا من ضاق بالقاف اواسيـه
شاعر وومّـر كـل شطـرٍ كتبنـاه
اكتب حروف الشعر من كيفي ووفيه
والشعـر وهبـه والعفـو ماشرينـاه
وغيري كثير النـاس لشعـر تنخيـه
الناس واجد ياهـل العـرف تنخـاه
لامن كتـب بيـتٍ تعـزوا بعزاويـه
مسكيـن ياللـي كـل شطـرٍ تبنـاه
وانا احمد الله كـل شطـرٍ موازيـه
لاطـاح شطـرٍ قـام خيّـه تـوازاه
العقـل وافـي واحمـدلله مكسـيـه
بالطيـب والمعـروف حنـا كسينـاه
حاضر بحاضر ياهل الحسد اسويـه
والموت حقٍ يحصـد العمـر يفنـاه
متين شطرٍ وافي العـرف محصيـه
ساعه وثلث الطـرق حنـا بدعنـاه
وختم قصيدي عـد ماهـب ذاريـه
على النبـي اللـي طريقـه مشينـاه