الغصن عايش ولو طارت عصافيره

ياخاطري مايفيد الضيق والحسره . . . والحزن قتال لاهبت اعاصيره

لاتحسب اللي جرالي في الهوى كسره ... الغصن عايش ولو طارت عصافيره

ياصاحبي من سوايا القلب لاتشره . . . القلب باقي على ذكرى مساييره

من قسوه البرد عندي للدفاء جمره . . . جمره غضى تشتعل بالهم والحيره

احيان اشوف الخفوق يحب مايكره . . . واجيب لجله عذر واقبل معاذيره

واحيان اشوف الجفا يطغى على صبره . . . يهز عرش الضلوع ومابقى ديره

ياويل قلبي بترحل كمل السهره . . . ماراح نلقى من الاحزان تأشيره

ولاتحسب اللي جرالي في الهوى كسره . . . الغصن عايش ولو طارت عصافيره